پينار و چنگيز( داستان توركي)
| نوشته شده توسط داريوش عاشوري |
|
|
ناغيليميزا نم نه قه ديرسويوق هاوا لازيمدير اوقده ر سويوق كي ائشيديب ائله سه ز-بيربالاجا قيز يوخسا اوغلان -قيشين لاپ او سويوق گونلرينين بيرينده،آياق يالين وكوينكجك -تك وتنها- جادده ده يول گئديربلكه يئتيشسين مدرسه يه واگر يوبانسا آقاي ناطيم شاللاق الينده اونو گوزله يير،دئمك آغلايا بيله سيز......وسويوق آغلاتماسا سيزي وبو قده ر اوزاق يول، يوخسا كفايت ائتمه سه وشاللاغين آغريسي ائيله يه بيلمه سه كدر لنديرسين سيزي، اوندادير كي اوشاقلار!اوزونوز ائيله يه بيلرسينيز خيالا داليب ذ ئهنينيزده ن كئچيرده سيز،بو اوشاق صبحانه يئمه ييب آتاسي يوخدو يئتيمدي، بير قيچي آخسايير.ايشله مكدن واخت ائيله مه ييب درسينه باخسين. يول اوزرينده، جيك جنواردان قورخورآياغي زوويوب بير نئچه دفه يخيليب و آيري- آيري باشقا نيسگگيللي اولايلارلا ناغيليميزا لازيم اولان دويغولاري ،اوره يينيزده يارلدا بيله رسينيزوآمما بواوشاغين آدي :
قيز اولساپينارواوغلان اولساچنگيز دير.
.يئل قارين دنه لريني اوز گوزومه سپه له ييردي . اللريم دونوردو وجانيم گيزيلده ييردي. دئييرم اوشاقلار ،او گونلر گئدسين گلمه سين.آلله سيزه اوگونلري گوسترمه سين .عجب آمما اشتباه ائيله ديم يوبانديم .كندين ميني بوسو گئتميشيدي وايندي من مجبورودوم اون كيلو متر يليك يولو پيادا گئده م وائله ده اولدو.آمما سيزه دئييم كي يولدا، باشيما چوخ ايشلر گلدي وايندي من بير –بير اونلاري سيزه دئيه جه يم ودئيه جه يه م يولدا كيملري گوردوم. آمما اوشاقلار! اجازه وئره جكسيز هرده ن ده بيرآز- يالاننان اولموش اولسادا- ناغيليميزين شيرين اولماسيندان خاطيره،منده سيزين كيمي ،خيال قووه سيندن يارديم آليم. بيليرم كي سيز اوقده ر هوشلوسوز كي بيله جك سينيزسوزلريمين هاراسي دوغرودور ،هاراسي ناغيل.بو ايشيميز اوقده رده فايداسيز دئييل، نيه كي بلكه منيم خاياليمدان كئچديكلري چوخلارينين باشينا گليب .و ائله، لاپدا دوغرودان گليبدير.وسيز بوناغيلدا بلكه بير نئچه آتا بابا سوزلريله ده تانيش اولاجاقسيز.وكند لريميزده اوشاقلار نئجه ياشاييرلارواونلارين باشلارينا نه اويونلار گليرونه دورومدا درس اوخويورلار،بيله جك سينيز.كولك دالدان ائله چيرپيردي كي ،سويوق سوموكلريمه ايشله ييردي. قالين پالتوومدا بو سويوقون برابرينده ،كار كسميردي. هئي دونوردوم داليا باخيرديم كي گوروم بلكه شانسيمدان بير ماشين گلير يوخسا يوخ؟ و آمما يوخ !هردفه ماشين يئرينه، كولك بير سيللي ووروردو قولاغيمين ديبينه.ومن تئز دونوردوم اونومه.قيشدا سحر تئزدن،گئجه هله داغلاردان اوزولمه ميشدن اونجه ،بلكه سيز آدام آدديملارينين ايزلريني آغ -آپپاق جادده ده گوره بيلمه يه جكسينيز.ومنده گئري دن ،يالنيز اوز آدديملاريمين ايزلريني گوروردوم واودا- فقط -كولكدن سيللي ييه ن چاغلاردا.و آمما اونومده آدام يوخ ،قورد آياقلارينين ايزلريني تانيرديم آنجاق اوزومه اوره ك وئريردم، بو بالاجادير! دووشان آياغينين ايزيدير.و داي لاپ بويوك نطريمه گلنده اوز-اوزومه دئييرديم ايت آياغينين ايزيدير.واصلا قورد آديني ديليمه گتيرميرديم.ومن باشيمي ساليرديم آشاغي.هاوا هله ايشيقلانماميشدي، بيز بونا دئيه ريك آلا قارانليق.وشهريار، بويوك شاعيريميزشعرلرينين بيرينده سحرين بوچاغيننان سوزآچيب ،دان اولدوزوندان دانيشيب ،"دان اولدوز ايستر چيخا گوز يالواري چيخما او چيخماسادااولدوزومون يوخدو چيخاري".هله من يولون ياريسيني گئتمه ميشديم كي قوردلارين اوولدوسو ،قورخونو سالدي جانيما .قوردلارين بيريسي بيلميرم هاردان اي آپاردي كي من قورخورام ،گليب دوز داياندي قاباغيمدا. قورد گوزلريني زيلله ميشدي گوزلريمه ومن قيشلاريم قورخودان تيتره ييردي.اوزومو ايتيرمه ديم بويوك ننه مدن ائشيدميشيديم قورد اوز گوجونو بيلمز. ائله بو كي ياديما دوشدو پالتومو چيخارديب توللاديم قوردون باشينا. وجومدوم يازيق قوردون اوستونه .گوزونوز يامان گون گورمه سين. يوموروغومو داياديم قوردون اوست داماغينا، ديرچه ييمي قويدوم قوردون چنه سينه، ائله بير آز كي زور وئرديم يازيق حئيوانين انگيني سينديرديم. قورد يئرده چوبالاييردي .ومن قولوم بتردن يارالانميشيدي .مين جور مصيبتينن پالتومو قورددان اليب، گئنه دوشدوم يولا.وآمما بيليرم كي بيلديز كي بو همن ناغيليميزين او يالان بولومويدو.هر حالدا من بوناغيلدا گركدير كي يارالانام. اوزوده يامان بتر يارلانام. اوجوره كي سيز ائشيدنده، اوره ييز يانا وياماندا ناراحات اولاسيز .باياق دئديگيم كيمي ،بو جريان سيزي چوخ كدر لندير مسه، اوزوز اآيري بيرحاديثه ايله مني يارالايين .آياغيمي زويولددين ييخيليم دره يه ،بيلميرم كي گويلوز ايسته يير اگر آغزي اوسته مني چيرپين يئره، آغزي بيرنيم قاناسين. ومن،اوزوم دئديگيم ساياق، يوخسا سيز دئديگينيز كيمي بتردن يارالانيب چوخ آغير بير دورومدا دوشدوم يولا.اوزاقدان بير قره لتي گوردوم .هاوا هله دوزه مللي ايشقلانماميشدي. قول ساهاتيمين صفه سينين بوزونو ديرناغلاريملا جيزيب باخديم ساهاتا. هله مدرسه نين زنگينه ايكي ساهات قاليردي.ياواش ياواش قارالتيا ياخينلاشيرديم. ومن ،اونو تانيديم. اوز كيلاسيمين شاگيردلريندن بيريدي .واونون آديدا ياديمداييدي.پينار ،يوخسا سيز دئيين چنگيز.هه ياخشي دئديز چنگيز،نيه كي اوغلان اولسا ناغيليميزا چوخ ياراشار. .چنگيز،مني گورجك تانيب قاچدي قاباغيما. اليني آتدي منيله گوروشسون آمما گوردو قولوم بتردن يارالانيب ومن اونا قوردون جريانيني دئديم. وچنگيزمنيم سوزلريمه ايناندي نيه كي كند اوشاقلاري آقانين سوزلرينه اينانارلار.دوز اولورسا اولسون يالان اولورسا اولسون. اقاهرنه يي بيلروآقا همشه دوز دانيشار.اوشاختادا چنگيز، كوينه ييني چيخاريب كوينكجك قالدي .پالتومو چيخارديب سالديم چينينه.وباخيب اوزونه چانتاندا چوره يين وار؟سوروشدوم. بدوستان كتلرينده كيفه چانتا دا دئيه رديلر.چنگيز باشيني سالدي آشاغي ودئدي: يوخ هئچ نه يوخومدو. ومن آمما، يامان يورولموشودوم و چنگيز، بيرياندان آجالماغيمي بيليب، بيريانداندا يورولماغيمي دويوب دوداقلاري قاچدي باشلادي گولمه يه. چنگيزين گولمه يي منه آجيق گلدي وياديما دوشدو بويوك ننه مين سوزو كو، دئيه ردي:اوشاقلا چوله چيخما ائششه كدن ييخيلسا، آغلارو ائششه يين ييخيلسا گولر.وچنگيز تئز آنلادي كي اينجيميشه م .يارالي قولومو سالدي بوينونا ودئدي:آقا اجازه وئرسه ز بيزيم كنديميز ياخيندي ،سيزي آپاريم ائوه، بيرآز يئمك يئييب واستراحت ائده ك، سونرا دوشك يولا گئدك مدرسه يه.آج اولدون چوبانا قوشول توخ اولدون كروانا.وآز – چوخ يول گئديب يئتيشديك كنده ،آمما يولدا يامان چوخ دانيشديق.ومنيم قولومون آغريسي نفسيمي كسيردي،بئله ليكله قبول ائتديم گئده ك اونلارين ائولرينه. اوشاقلار! كتلرده ائولر ايكي اوتاق بير دهليز اولار. اوتاقلارين بيري چوخ اوزون اولار آمما اوبيريسي بالاجا . بالاجادا فرش توخويارلارو بويوكده قوناقليق وئره رلر. دهليز لرينده نم نه قه دير باشماق واريدي. چوخودا ائله جيريق چكمه ايله اوست اورتولو دمپاييدي. آجليق مني ائله كيرخديرميشيدي كي قولومون ياراسي ياديمدان چيخميشيدي واوندان اونمليسي بو كي، چنگيزينن، ائيله يول گلديك، هله من اونلارين دهليز لرينه يئتيشمه ميش بيله بيلمه ميشديم كي، بويازيق اوشاق دمپاياليدي ومن بير سوز سوروشماديم. آمما باخديم گوزلرينه، گوزلريم دولدو ياشيلا وچنگيزباشيني ساليب آشاغي دئدي: آقا عادت ائيله ميشيك، بويورون ايچري .ومن ايچري گيرديم چنگيزين بئش باجيسي واريدي،گويلونوز ايسته سه اونلارين بيرينين آديني قوياق پينار.و ايكي قارداشي كي اونلارين لاپ بويوگوده، چنگيزيدي. واوبيريليلر بير ايكي ياش بوندان بالاجا. آنا، يورقان دوشكده اوزانميشيدي. چنگيز ياخينلاشيب آناسينا دئدي :آقاميزدي يولدا قالميشيدي. قوردا راست گليب يارلانيبدي. وپينارين آناسي دانيشا بيلميردي. اوسگوره – اوسگوره باخدي منيم اوزومه وگولدو. گولنده بيرلحظه من اونون ديشلريني گوردوم .بير هه - بير يوخ، توكولموشدو. قالانلاريدا ائله سارالميشيدي كي آدام دئييردي به آغزيندا كي ديشلر قيزيلدي. وچنگيز منه بويورو ايله ش دئمه دي. اوزوم بيلديم كي گره ك ايله شم. وايله شديم. اوشاقلار،يانيمدان دوروب رديفينن دوزولوب اوتوردولار اوزبه اوزومده. هامميسي گوزلريني بره ميشديلر گوزلريمه. هر نه سوروشوردوم ائله يالنيز اوزومه باخيرديلاروگولوردولر. هامميسينين ديشلري ساليميدي وآمما ائله قره ليب سارلميشيديلار كي بللي دير آنادان اولاندان يويولماييب لار.پينار ائشيكدن سورا گلدي، الينده يئكه بير دسترخان، ائله بيل اون نفر قوناق واردي وسردي يئره .اوچ ايستكان سوت بيركاسا قاتيق بيرسيني چاي وبير قاش پنيروبير آز چوره ك قويدو منيم قاباغيما. وائله اودا اوبيري لر كيمي گئديب اوتوردو بير ياندا وباشلادي منه باخماغا. ائله بيرينجي بلله ني تپميشيديم آغزيما، آنانين اوره يي بولاندي و باشلادي قوسماغا. حاليم قاريشميشيدي وآمما بيرياندان قولومون ياراسي و بير ياندان آجليق امان وئرميردي وانانين ساچلاري گنج چاغلاريندا آغارميشيدي ومن ايرگه نه –ايرگه نه بيرنئچه بلله يئييب قالخديم آياغا. مدرسه نين واختيندان بلكه بيرساهات سووشموشدو.آياق اوسته اليمي چكديم پينارين توكلرينه، وسوروشدوم، نئچه ياشين وار قيزيم ؟باخدي اوزومه ودئدي :واووووواووووووچنگيز دئدي:لالدي آقا ومن باشيمي سالديم آشاغي توكلريم بيز – بيز دورموشدو ايندي داها يالنيز آغريان يئريم اوره ييميدي. گوزلويومو ووردوم گوزومه بلكه چنگيزآغلاماغيمي گورمه سين. آغاجلاردكي قيشدان دونان سولغون بوداغلار،يئين اسن كوله يين ايله نجه سينه دوغروشدو. يارالي قولومو سالديم قوينونا ودوشدوك يولا.ويولدا سوروشدوم چنگيز؟ اوخماق باجارير سان مي؟گئجه دن ياغميش قارلار گونش چيخديقجا آستا – آستا اريردي وكندين كوچه لريني ديزه تك پالچيق ائتميشيدي.يول بوسبوتون كئچيلمه زيدي،آياغيم بورخولدو اوزو اوسته يئره چيرپيلديم.ويارامين اوستونه سانكي تندير كولو توكدولر.قولومدا قان كيرلنميشدير. ومدرسه يه ده ك چنگيز اوخودو...اوشودوم ها اوشودوم داغدان آلما داشيديم آلماجيغي آلديلار منه ظولوم سالديلار من ظولومدن بئزارام درين قويو قازارام بولوتلار گاهدان بيربولانيق كولگه كيمي باشيميزين اوستوندن كئچيردي .آقاي ناطيم شاللاق الينده دورموشودو مدرسه نين قاپيسيندا. باشيمي ساليب آشاغي، گيرديم كيلاسا. چنگيزين يئري بوشودو. يارالي قولومو قويدوم ميزين اوستونه. كوريدوردان چنگيزين سسيني ائشيديرديم آ والله داي يوبانماريق ! وناظيمين سسي: من چند بار بهت گفتم كه دير نكن وچنگيزين سسي :آ آنلاماميشيق! آ قوران حققي داها داي يوبانمارام وناطيمين سسي: دفعه اولت كه نيست كره خر! وچنگيزين سسي: پوخ يئميشم آ حضرت عابباس حققي غلط ائله ميشم وناطيمين سسي :يه بلايي به سرت بيارم كه حال كني وچنگيزين قهر باسميش اوجا هارايي:آ ال چك دئديم يوبانمارام.................... ومنيم قان سئچرادي گوزلريمه ،چنگيزين سسي داي ائشيديلمه دي. حيرصيله قاپيني آچديم.و.... ناطيمين آغزي دولموشودو قانينان. وچنگيز داليسينا باخمادان قاچيردي. دمپاييلاري قالميشيدي كوريدوردا. وناطيم سريلميشيدي دووارا.بير نئچه ايل سووشدو اوشاقلار.ومن چنگيزدن خبرسيزيديم. تبريزين زيندانينين، بويوك دمير بير قاپيسي وار. خياوانين بو تاييندا زيندانين اوز به اوزونده بيرقه فه وار .ومن اوتورموشودوم اوردا قليان چكيرديم .قار سپه له ييردي ومنيم قولومون ياراسي چوخدانيدي كي دوزه لميشيدي .آمما قار ائله هرايل قيش ياغيردي ومن شوشه نين بخاريني بارماقلاريملا سيليب ائشيگه باخيرديم. قليانيمي خورولدادا – خورولدادا گوزوم دوشدو زيندانين دمير قاپيسينا. بيرگنج اوغلاني اللري باغلي تپيرديلر ايچري. گوزومه يامان تانيش گليردي او جاوان .بير دفه ده گوزلريم دولدو ياشينان .شوشه نين شئحينده بارماقلاريملا يازديم قيز اولسا پينار واوغلان اولسا چنگيز واوشاقلار بو ناغيل ياراندي.
سون
1388 –گوز- داريوش عاشوري
|
نظرات شما عزیزان:
